भदौं २२—अमेरिकी राष्ट्रपति डोनाल्ड ट्रम्पले इस्लामिक अतिवादी संगठन तालिबानसँगको शान्ति सम्झौताबाट पछि हट्ने बताएका छन् ।
शान्ति सम्झौताको प्रक्रियाअन्तर्गत पछिल्लो वैठकमा ट्रम्प तालिबान नेता र अफागनी राष्ट्रपति समेत सहभागी हुने गोप्य बैठकमा सहभागी हुने कार्यक्रम थियो । तर, अब उक्त वार्ता नै रद्द गरिदिएको ट्रम्पको भनाइ छ ।
माइक्रो ब्लगिङ साइट ट्वीटरमा सन्देश लेख्दै राष्ट्रपति ट्रम्पले पछिल्लो पटक बिहीबार भएको एक कार बम विस्फोट पछि शान्ति सम्झौता नै रद्द गर्ने बताएका छन् ।
बिहीबार अफगानिस्तानको राजधानी काबुलमा भएको कार बम विस्फोटमा एक अमेरिकी सैनिकसहित १२ जनाको मृत्यु भएको थियो । उक्त हमलाको जिम्मेवारी तालिबानले लिएको थियो ।
अफगानिस्तानका लागि विशेष अमेरिकी राजदूत जल्मे खलिलजादले गत सोमबर तालिबानसँग सैद्धान्तिक रुपमा एक शान्ति सम्झौता हुने बताएका थिए ।
प्रस्तावित शान्ति सम्झौताअनुसार अमेरिका अबको २० मा अफगानिस्तानबाट आफ्ना ५ हजार ४ सय सैनिकलाई फिर्ता बोलाउन राजी समेत भएको थियो । यद्यपि उक्त सम्झौतालाई अन्तिम रुप भने राष्ट्रपति ट्रम्पले नै दिने भनिएको थियो ।
तर, बिहीबार काबुलमा भएको बम विस्फोट पछि तालिबान पक्षबाट शान्ति सम्झौताको पालना हुने विषयमा अमेरिकाले आशंका जनाएको छ । तालिबानले १९९६ देखि २००१ सम्म अफगानिस्तानमा शासन गरेको थियो ।
अफगानिस्तानमा २००१ देखि अमेरिकाको अगुवाइमा सैन्य अभियान शुरु भएको थियो । अन्तर्रा्ष्ट्रिय गठवन्धन सेनाको रुपमा भएको सैन्य अभियानअन्तर्गत हालसम्म करिब ३ हजार ५ सय सैनिक मारिएका बीबीसीले जनाएको छ । मारिनेमध्ये २ हजार ३ सय जना अमेरिकी सैनिक छन् ।
एजेन्सी