माघ १७, काठमाडौ– संस्थापन पक्षकै नेताबीच जिल्ला तहमा प्रतिस्पर्धाको स्थिति बनेपछि सभापति सुशील कोइरालासहितका नेता आफ्नो पक्षको बिवाद मिलाउन सक्रिय छन्।
वरिष्ठ नेता शेरबहादुर देउवा पक्षले फाइदा लिनसक्ने भन्दै संस्थापन पक्ष विवाद मिलाउन लागिपरेको हो। आन्तरिक विवाद र प्रतिस्पर्धाले महाधिवेशन प्रतिनिधि छनोटमा असर पार्ने देखिएका जिल्लामा सभापति कोइरालाले निकट नेतालाई टेलिफोन गरी मिलेर अधिवेशन सम्पन्न गर्न आग्रह गरिरहेको निकट स्रोतको दाबी छ।
आफ्नो बेमेलको फाइदा अर्को पक्षलाई नपुगोस्, मिल्न उहाँ९सभापति कोइराला०ले आग्रह गरिरहनु भएको छ,’ कोइराला निकट स्रोतले भन्यो,‘राम्रो गर्न भनिरहनु भएको छ।’
कोइरालाले सोमबार संस्थापन पक्षका केन्द्रीय नेतासँग समेत भेटेर जिल्लाको अवस्था बुझेका थिए। त्यसपछि उनी निरन्तर जिल्ला नेतासँग सम्पर्कमा रहेको निकट स्रोतको दावी छ। निकट नेताबीच प्रतिस्पर्धाले शुक्रवारबाट सुरु भएको गाउँ, नगर अधिवेशनमा मात्रै होइन क्षेत्र जिल्ला हुँदै केन्द्रीय नेतृत्व चयनसम्मै असर पार्ने संस्थापन पक्षको बुझाई छ।
पुराना नेता वडामै पराजित
यसैबीच जिल्ला विकास समिति बाँकेमा दुई कार्यकाल सभापति बनिसकेका कांग्रेस पूर्वसभापति ओमजंग राणा शुक्रबार पार्टीको इकाइ बुथ निर्वाचनमा क्षेत्रीय प्रतिनिधिमा पराजित भए। नेपालगन्ज उपमहानगरपालिका वडानम्बर २८ को निर्वाचनमा उनले तीन मत मात्रै पाए। महिला संघ बाँकेकी सभापति नारायणी रुपाखेती पनि शुक्रबार पार्टीको इकाइको निर्वाचनमा नेपालगन्ज उपमहानगरपालिका वडानम्बर २ बाट क्षेत्रीय प्रतिनिधिमा पराजित भएकी छन्।(नागरिक दैनिकबाट)