भाद्र १०, काठमाडौं – उन्नाइस वर्षमूनिको साफ पुरुष फुटबल च्याम्पियनसिपमा आजको सेमिफाइनल चरणका दुई खेल हुनेछ । सातदोवाटोस्थित एन्फा कम्प्लेक्समा हुने सेमिफाइनलको पहिलो खेलमा नेपालले अफगानिस्तानसँग मध्यान्ह १२ः०० बजे प्रतिस्पर्धा गर्नेछ भने दोस्रो खेलमा भारतले दिउँसो ३ः३० बजे बङ्गलादेशको सामना गर्दैछ ।
यस उमेर समूहको पहिलोपटक साफ च्याम्पियनसिप सञ्चालन भइरहेको छ । एन्फा कम्प्लेक्समा आज आयोजित पत्रकार सम्मेलनमा चारै टोलीले सेमिफाइनल चरणका लागि आफ्नो दाबेदारी प्रस्तुत गरे ।सो कार्यक्रममा नेपाली टोलीका प्रशिक्षक बालगोपाल महर्जनले पहिलो कमिकमजोरी सुधार गर्दै अफगानिस्तान विरुद्ध उत्कृष्ट प्रदर्शन गर्ने बताउनुभयो ।
टोलीका कप्तान बिमल घर्तिमगरले अफगान टोली विरुद्ध उत्कृष्ट प्रदर्शन गर्ने बताउनु भयो । त्यस्तै अफगानिस्तानका प्रशिक्षक साहेव राजवले नेपालको मौसमसँग पनि बुझिसकेका कारण आफ्नो खेलाडीले नेपाल विरुद्ध उत्कृष्ट प्रदर्शन गर्ने बताउनुभयो । बङ्गलादेशका प्रशिक्षक बानि तुतुले भारत प्रतियोगिताको उत्कृष्ट टोली भएतापनि आफुहरुले सहजरुपमा खेल्छौ भन्नु भयो ।
भारतका प्रशिक्षक सबिर पासाले बङ्गलादेशसँग सजग भएर खेल्ने बताउदै भूतकालको प्रदर्शनभन्दा भविष्यको प्रदर्शनलाई हेरेर खेल खेल्ने बताउनुभयो ।