मंसिर २१, दैलेख द्धन्द्धकालमा बिद्रोही नेकपा माओवादीबाट हत्या गरिएका दैलेखका पत्रकार डेकेन्द्र थापाको मुद्दामा जिल्ला अदालतले फैसला गर्दै प्रतिवादीहरूलाई अधिकतम दुई वर्षसम्मको कैद सजाय सुनाएको छ । जिल्ला अदालत दैलेखले आइतवार गरेको उक्त फैसलामा अभियुक्तहरु निरकबहादुर घर्ती, हरिलाल पुन र जयबहादुर शाहीलाई दुई —दुई वर्ष तथा लक्षिराम घर्तीमगरलाई एक वर्ष ६ महिना र वीरबहादुर केसीलाई एक वर्षको कैद सजाय सुनाएको अदालतका तहसिलदार सुनिल खाँडले जानकारी दिए ।
मुद्दाका जम्मा ९ प्रतिवादीमध्ये थिउरी पुराकोट—१ बमबहादुर खड्का र केशव खड्का, कट्टी—७ मुक्ति भन्ने बमबहादुर खड्का, बाँकेको कोहलपुर— ३ का भक्तिराम लामिछाने फरार छन् । उनीहरूको हकमा मुद्दा मुल्तबीमा राखिएको अदालतले जनाएको छ । पुर्पक्षका क्रममा थुनामा रहेका वीरबहादुर केसी र लक्षिराम घर्तीमगरले उनीहरूलाई तोकिएको कैद भुक्तान गरिसकेकाले फैसलासँगै उनीहरू थुनामुक्त हुनेछन् । दुई वर्षको कैद सजाय तोकिएका निरक घर्ती पनि एक वर्ष सात महिना एक दिन कैदमा बसिसकेका छन् । अब उनी चार महिना २९ दिन कैदमा बसे पुग्नेछ ।