कात्तिक ४, काठमाडौं अघिल्लो विघटित संविधानभा अधिकांश समय रिसोर्टमा बिताएका दलहरुले नयाँ संविधानका विवादित विषयमा सहमति खोज्न भन्दै गोकर्ण रिसोर्टमा सुरु भएको आवासीय बैठक आजलाई विना निष्कर्ष समापन भएको छ । शीर्ष तीन दल कांग्रेस, एमाले र एमाओवादीका नेताहरू अन्तिम प्रयास भन्दै रिसोर्टतिर लागेका हुन् । तर, आज विषयवस्तुमै प्रवेश नभएको स्रोतले जनाएको छ ।
आजको बैठकमा एमाले अध्यक्ष केपी शर्मा ओली बैठक छाडेर हातको उपचार गर्न तिर लागेकाले बैठक अलपत्र परेको माओवादीका नेताले आरोप लगाएका छन् । उनी ढिलो गरी रिसोर्ट पुग्दा बैठक विषयवस्तुमै प्रवेश नभइ नेताहरु लाखापाखा लागेका थिए । आजको बैठकले विश्वासको वातारण भने बनेको नेताहरुले जनाएका छन् । भोलिदेखि विषयवस्तुमा प्रवेश गर्ने एमाले नेता इश्वर पोखरेलले जानकारी दिए । बैठकका लागि अन्य शीर्ष नेता बिहान १० बजे नै गोकर्ण पुगे पनि एमाले अध्यक्ष ओली भने अपराह्न ३ बजे मात्रै पुगेका थिए ।
विवादित विषय राज्य पुनःसंरचना, शासकीय स्वरुप तथा न्याय र निर्वाचन प्रणालीका विषयमा दलबीच पटक–पटक वार्ता र छलफल भए पनि सहमतिका लागि कुनै प्रगति नभएपछि निर्णायक भन्दै रिसोर्ट पुगेका हुन् । बैठकमा कांग्रेसका वरिष्ठ नेता शेरबहादुर देउवा, उपसभापति रामचन्द्र पौडेल र महामन्त्री कृष्णप्रसाद सिटौला, एमालेका अध्यक्ष ओली, नेता माधवकुमार नेपाल र महासचिव ईश्वर पोखरेल तथा एमाओवादीका अध्यक्ष पुष्पकमल दाहाल, वरिष्ठ नेता डा बाबुराम भट्टराई र उपाध्यक्ष नारायणकाजी श्रेष्ठ सहभागी थिए ।