कृषकलाई सहुलियत कार्ड वितरण गर्ने सरकारको तयारी

जेठ २०, काठमाडौ–सरकारले कृषकहरुलाई सहुलियत कार्ड वितरण गर्ने भएको छ । त्यसका लागि कृषि मन्त्रालयले कृषकहरूको पहिचान र वर्गीकरण गरी तोकिएको सुविधाहरू उपलब्ध गराउन र उत्पादकत्व वृद्धिमार्फत जनताको खाद्य पोषण सुरक्षा सुनिश्चित गर्न ‘कृषकलाई सहुलियत कार्ड’ वितरण तथा प्रयोग निर्देशिका, २०७१ को मस्यौदा तयार गरिसकेको छ । राष्ट्रिय कृषि नीति, २०६१ अनुसार कम स्रोतसाधन भएका कृषकहरूलाई रासायनिक र प्राङ्गारिक मल एवम् उन्नत बीउबिजनलगायतका कृषि सामग्रीमा अनुदान उपलब्ध गराउने उद्देश्यले सहुलियत कार्ड वितरण गर्न लागिएको हो । सरकारले कृषकलाई आव २०५५/५६ देखि रासायनिक मलमा र आव २०६८/६९ देखि प्राङ्गारिक मल एवम् उन्नत बीउबिजनमा अनुदान उपलब्ध गराउादै आएको छ । अनुदानका अतिरिक्त अन्य सहुलियत उपलब्ध गराउन एकद्वार प्रणाली लागू गर्न कार्डको व्यवस्था गर्न लागिएको हो ।