वैशाख ३१, काठमाडौ–नाइजेरियाको विद्राही संगठन बोकोहरामले अपहरण गरेका छात्राहरुको रिहाइका लागि सरकार वार्ताको तयारीमा रहेको त्यहााका अधिकारीहरुले बताएका छन् । नाईजेरिया सरकारका एक मन्त्री तनिमु तुराकीले बोको हरामले आफ्ना साथीहरुको रिहाइ गरेपछि अपहरित छात्राहरुलाई छोड्ने बताएकाले त्यसका लागि वार्ता अगाडी बढाइने बताएका छन् । पश्चिमी शिक्षाको विरोध गर्दै आएको बोको हरामले आफ्ना केही कमाण्डरहरुलाई सरकारले मुक्त गरे छात्राहरुलाई छोड्न तयार रहेको बताएको ती मन्त्रीले जानकारी दिए । बोको हरामले चार हप्ताअघि नाइजेरियाका करिब २ सय स्कुले किशोरीहरुलाई अपहरण गरेको थियो । तीमध्ये कतिपय किशोरीहरु भागेर घर फर्किसकेका छन् भने बााकी किशोरीहरुलाई बोकोहरामले इस्लाम बनाएर एक भिडियोमार्फत सार्वजनिक गरेको थियो । भिडियोमार्फत सार्वजनिक गरिएका किशोरीहरुको पहिचान भैसकेकाले उनीहरुलाई छुटाउनका लागि पहल भैरहेको नाइजेरियाको सुमे बोर्नो प्रान्तका गभर्नर कासिम शेट्टीले जानकारी दिएका छन् ।
