काठमाडौं – प्रधानमन्त्री केपी ओलीलाई उनका समर्थकहरु अडान भएका नेता मान्छन् । तर, विगतमा उनले माओवादीका सन्दर्भमा बोलेका कुरा र अहिले भइरहेको गठबन्धनलाई तुलना गर्ने हो भने ओलीको अडानमाथि आशंका गर्ने ठाउँ प्रसस्तै देखिन्छ ।
यसैसन्दर्भमा अनलाइनखबरले केपी ओलीको एउटा पुरानो भाषणको रेकर्ड फेला पारेको छ । सो भिडियोमा गत संविधानसभा चुनावमा माओवादी र राजावादीको नाम लिँदै ओलीले भनेका छन्- अछ्युँ खाएँ, बछ्युँ खाएँ, झुँसे बारुलोको के कुरा गर्नू !’
एमाले अध्यक्ष ओलीले झापाको क्षेत्र नं ६ स्थित गौरादह बजारमा गरेको भाषणको भिडियो अनलाइनखबरले फेला पारेको छ । सो भिडियोमा ओलीले एमाओवादीलाई मावनताविरोधी शक्तिका रुपमा चित्रण गरेका छन् ।
तर, अहिले तिनै माओवादी र पूर्वपञ्चलाई दायाँ वायाँ राखेर सरकार चलाएपछि झापाका एमाले कार्यकर्ताले आश्चर्य व्यक्त गरेका छन् ।
झापाको गौरादहबाट केपी ओलीको भिडियो बोकेर अनलाइनखबरको कार्यालयमा आइपुगेका एकजना एमाले कार्यकर्ताले भने- ‘पहिले माओवादी र पञ्चहरुलाई जंगलीहरुजस्तै गरी निन्दा गर्नुहुन्थ्यो, अहिले तिनैको सहायतामा उहाँ प्रधानमन्त्री छानिँदा हामीलाई यो भिडियोको पुनः याद आयो ।’
झापा क्षेत्र नं ७ का जनप्रतिनिधि रहेका प्रधानमन्त्री ओलीले चुनावका बेला भाषण गर्दै भनेका थिए कि झापा क्षेत्र नं ६ बाट दीपक कार्कीलाई जिताएर पठाएको खण्डमा मन्त्री बनाइनेछ ।
भिडियोमा ओलीले कार्कीजीलाई सभासद जिताएर पठाए यो क्षेत्रले सांसदमात्रै होइन, मन्त्री नै पाउने बताएका छन् ।
तर, अहिले दीपक कार्कीलाई मन्त्री नबनाई सोही गाउँका अग्नि खरेललाई मन्त्री बनाइएपछि कार्की पक्षधरहरु ओलीको भिडियो बोकेर सञ्चारमाध्यमसम्म धाउन थालेका हुन् ।
‘कार्की गौरादहका पुराना र स्थापित नेता हुन्, अग्नि खरेललाई हामी चिन्दैनौं, कार्कीलाई मन्त्री नबनाइएकोमा गौरादहबासीको चित्त दुखेको छ’, भिडियो लिएर अनलाइनखबरमा आएका ती एमाले कार्यकर्ताले भने ।
‘नेताले चुनावका बेला बोलेका कुरा पूरा गर्नुपर्छ, यदि प्रधानमन्त्री ओली यदि वचनका पक्का हुन् भने आफूले बोलेको कुरामा अडियुन् ।’
प्रधानमन्त्री केपी ओलीले कानूनका विज्ञ अग्नि खरेललाई कानूनमन्त्री बनाएपछि सांसद दीपक कार्की रिसाएका हुन् । पूर्वप्रधानपञ्चसमेत रहेका सांसद कार्कीले एसएलसीसम्म अध्ययन गरेका छन् ।