जेठ १८, रामेछाप, जिल्लामा सरकारले उपलब्ध गराउने १५ हजार आर्थिक सहयोग सम्बन्धित गाविसको खातामा निकासा गरिएको जिल्ला दैवी प्रकोप उद्धार समिति रामेछापले जनाएको छ ।
हिजो रामेछाप जिल्लाका २ गाविसको १ करोड ३६ लाख ६५ हजार रुपैयाँ निकासा गरिएको छ । जस अन्तर्गत रामपुर गाविसको ७५ लाख र भुजी गाविसको ६१ लाख ६५ हजार रुपैयाँ निकासा भएको हो । समितिका अनुसार अन्य गाविसमा पनि आवश्यक प्रक्रिया पुरा गरी आएमा तत्काल निकासाको व्यवस्था मिलाइएको छ । विनाशकारी भुकम्पका कारण प्रभावित बनेकाहरुलाई पहिलो चरणको राहत वितरण गरे लगत्तै समितिले यो दोस्रो चरणको राहत वितरण आजबाट सुरु गरेको छ । हालसम्म रामेछापमा ५६ हजार ५ सय थान त्रिपाल वितरण भइसकेको छ ।
त्यसैगरी टेन्ट १ हजार १ सय ९४ थान, चामल १५ हजार बोरा, कम्बल २२ हजार २ सय ३८ थान वितरण गरी सकिएको छ । समितिको हिजो बसेको बैठकले थप विभिन्न निर्णयहरु गरेको छ । जसमा रामेछापको क्षतिग्रस्त संरचनाको पुन निर्माणका लागि स्वास्थ्य तथा जनसंख्या मन्त्रालयमा अनुरोध गर्ने निर्णय भएको छ ।
त्यसैगरी जिल्लामा सञ्चालनमा रहेको सवल कार्यक्रम दुरागाउँ, भुजी, सैफु, लखनपुर र गौस्वारामा सञ्चालन गर्न स्वीकृति दिइएको छ । शान्ति र विकासका लागि युवा साझेदरी नेपाललाई ठोसे, नामाडी, बेताली, गोठगाउँ, गेलु, सालु, तिल्पुङ, साँघुटार, खिम्ति, सुकाजोर, ओख्रेनी, मन्थली ३ र पुरानागाउँमा प्रत्यक्ष राहत प्रदान कार्यक्रम सञ्चालन गर्न अनुमति दिएको छ ।
त्यस्तै नेपाल ग्रामीण पुननिर्माण संस्थालाई १ हजार सेट आपतकालिन आवास प्याकेज गौस्वारा र गुप्तेश्वर गाविसमा उपलब्ध गराउन स्वीकृति प्रदान गर्ने सहमति भएको छ ।
सदरमुकाम मन्थलीलाई जिल्लाको क्षेत्र नम्बर २ जोडने आकाशे को पुल यथाशीघ्र सम्पन्न गर्न सडक विभागलाई अनुरोध गर्ने निर्णय गरेको छ । विश्व खाद्य कार्यक्रमलाई खाद्य सुरक्षाका आधारमा राकाथुम, खनियापानी, कुबुकास्थली, बाम्ती भण्डार र गुम्देल गाविसमा खाद्यान्न वितरणको अनुमति दिने र अरनिको यातायात ब्यावसायी सेवा समितिले जिल्लालाई उपलब्ध गराउने ४३ वण्डल जस्तापाता कक्षा सञ्चालन गर्न नसक्ने अवस्था भएका विद्यालयलाई प्रदान गर्ने गरी जिल्ला शिक्षा कार्यालयलाई दिने लगायतका निर्णयहरु भएको समितिले जनाएको छ ।
नारायण श्रेष्ठ