त्रिवेणी मध्यवर्ती उपभोक्ता समितिको कार्यालयमा तालाबन्दी

वैशाख २८, नवलपरासी–नवलपरासीको त्रिवेणीमा रहेको त्रिवेणी मध्यवर्ती उपभोक्ता समितिको कार्यालयमा स्थानीयले शनिवार तालाबन्दी गरेका छन् । चितवन राष्ट्रिय निकुञ्जले एकतर्फी प्रणाली लागू गरेको, नारायणी नदीबाट अवैध रुपमा गिटी बालुवा निकासी गरेर रोयल्टी हिनामिना गरेको भन्दै कार्यालयमा तालाबन्दी गरेका हुन् । स्थानीय बासिन्दाको भेलाले अक्कलबहादुर थापाको नेतृत्वमा १३ सदस्यीय संघर्ष समिति नै गठन गरेर आन्दोलनमा उत्रिएका हुन् । निकुञ्जले संरक्षण, उपभोगको नाममा सार्वजनिक एवम् प्राकृतिक सम्पदा दोहन गरेको, निर्वाचनबाट निर्वाचित पदाधिकारीलाई निष्कृय पारिएको आरोप स्थानीयले लगाएका छन् । उनीहरुले आफ्नो माग पुरा नभएसम्म तालाबन्दी गर्ने संघर्ष समितिका प्रवक्ता प्रितम गुरुङले बताउनुभयो ।