फागुन ३, काठमाडौं – नेपाली काँग्रेसको केन्द्रीय कार्यसमिति बैठक आज बस्दैछ।
आगामी शनिबारदेखि गोदावरीमा हुन लागेको पार्टीको महासमिति बैठकको तयारीका विषयमा छलफल गर्न सभापति शेरबहादुर देउवाले केन्द्रीय कार्यसमितिको बैठक बोलाएका हुन्।
बिहीबार दिउँसो १ बजे सानेपास्थित केन्द्रीय कार्यालयमा बस्ने बैठकले महासमिति बैठकका एजेन्डाहरु तय गर्ने र बैठकमा प्रस्तुत गर्ने तयारी रहेका प्रतिवेदनहरु समेत पास गर्ने जनाइएको छ।
५ गतेदेखि ९ गतेसम्म हुने महासमिति बैठकमा उपसभापति पूर्णबहादुर खड्का, महामन्त्रीद्वय गगन थापा र विश्वप्रकाश शर्माले अलग–अलग प्रतिवेदनहरु पेश गर्ने कार्यसूची रहेको छ। सूचना तथा सञ्चार विभागका प्रमुख मीन विश्वकर्माले पार्टीले महासमितिको बैठकको सम्पूर्ण तयारी पूरा गरिसकेको जानकारी दिए।