वैशाख १०, काठमाडौं – मधेसी मोर्चासँग शनिवार साँझ भएको सहमति अनुसार संविधान संशोन प्रस्ताव परिमार्जनबारे निर्णय गर्न आज मन्त्रिपरिषद बैठक बस्ने भएको छ ।
क्याबिनेट बैठक आइतबार बिहान ११ बजे बोलाइएको प्रधानमन्त्रीको सचिवालयले अनलाइनखबरलाई जानकारी दियो ।
शनिबार सत्तापक्षका दलहरु र मधेसी मोर्चावीच भएको छलफलले संविधान संशोधन प्रस्ताव परिमार्जन गर्ने र स्थानीय तहको चुनाब दुई चरणका गर्ने सहमति गरेको छ ।
सरकारले तीनवटा प्रदेशको चुनाव बैशाख ३१ गते गर्ने र बाँकी चार प्रदेशको जेठ ३१ गते गर्ने मधेसी मोर्चासँग सहमति गरेको छ ।
यता मधेसी मोर्चाले संविधान संशोधन प्रस्ताव वपरिमार्जन गरिए त्यसलाई मान्ने र निर्वाचनमा सहभागी हुने सहमति जनाएको छ ।
शनिबार भएको सहमतिलाई बैधानिकता दिनका लागि आइतबार मन्त्रिपरिषद बैठक बोलाइएको हो ।
निर्वाचन आयोगसँग छलफल
यसैवीच मधेसी मोर्चासँग भएको सहमतिको भोलिपल्ट प्रधानमन्त्री प्रचण्डले निर्वाचन आयोगका पदाधिकारीहरुलाई छलफलका लागि बोलाएका छन् ।
आइतबार बिहान १० बजे निर्वाचन आयोगका पदाधिकारी र प्रधानमन्त्रीवीच छलफलको समय निर्धारण गरिएको प्रधानमन्त्रीको सचिवालयले जनायो ।
सरकारले दुई चरणको चुनावको मिति औपचारिकरुपमा घोषणा गर्न लागेकाले आयोगका पदाधिकारीसँग छलफल गर्न लागिएको हो ।
सरकार र आयोगका पदाधिकारीवीच दोस्रो चरणकको चुनावका साथै बैशाख १६ गतेको मनोनयन दर्ता गर्ने कार्यतालिकालाई तीन दिन पछि सार्ने विषयमा समेत छलफल हुने स्रोतले अनललाइनखबरलाई बतायो ।
प्रधानमन्त्रीसँग छलफल गर्नुपूर्व आइतबार बिहानै निर्वाचन आयोगका पदाधिकारीहरु आन्तरिक बैठकमा जुटेका छन् ।